تعالي من حزن قلبي

تعالي نـرســم البسمه ونجـعـل حـبـنـا باالـوان

تعالي من حزن قلبي الى الأفراح ودّيني

تعالي واسكبي دمعك على جرحي ترى عطشان

أنا ميّت ظما عقبك ابيك تجين تسقيني

تعالي نزرع الفستق ونقطف وردة الرمان

عليه طوّل غيابك أمانه لاتخليني

تعالي ياشفا قلبي وجودك يبعد الاحزان

انا مااقوى على الفرقى ذبحتيني ذبحتيني

تعالي لملمي جروحي وحطّي للقا عنوان

وخلّي فرحتي تكمل وأخذيني وظميني

تعالي من وطن صدّك ترى لك في الحشا أوطان

تعالي نوّري قلبي تعالي واسكني فيني

تعالي كمّلي لوحه بدونك لونها ذبلان

تعالي وامسحي دمعي بشوفك تهتني عيني

أنا مالي سواك احدٍ يتيم الأهل والخلان

تعالي يابعد عمري جريحٍ منك داويني

تعالي واعزفي لحنك على قلبي انا ولهان

تعالي واقصدي فيني وغني لي وغنيني

نحل حالي نحل جسمي تعب قلبي من الهجران

واذا ماانتي مصدقتني تعالي لي وشوفيني

وحيدٍ جالس لحالي وحولي اربعة جدران

أفكر بك واهوجس بك مع الأحلام تاتيني

تعالي نرسم البسمه على وجه القمر لابان

وخلّي حبنا يسطع ويشعر به ملاييني

ولا تحلم

هذاك اوّل انا احبك انا اعشقك انا اهـواك

.

هويتك بدّ خلق الله وعطيتك قلبي الوافي

.

هذاك اوّل ابي شوفـك ابي قربك ابي القاك

.

يهل الدمع من عيني وابيك تقوم بااسعافي

.

سهرت الليل من شانك أفكّر بس همّي رضاك

.

وشلت الهـم في قلبي وعشت فعالمٍ طافي

.

انـا آسف تجـنبني ترى عـفـتك ولا أبغاك

.

أبيك تغيب عن عيني وتهل الدمع بااسرافي

.

أبيك تعيش من دوني وحيدٍ والحزن يـملاك

.

تْعيش الحب من بعدي فعذاب وهمّ ياكافي

.

وابيك تْعرف شي واحد بعد كل ماحصل ويّاك

.

بحسّك حيل تتألم تشوف الموت بااخلافي

.

وانا عايش ومتهني مع اللي من الملا يسواك

.

هـذاك اللي الى منّه تكلـّم ذوّب اطرافي

.

شبيه الصبح لابيّن بزينٍ فاقـك وعـدّاك

.

عطاني الحب من قلبٍ صدوق ومخلص ووافي

.

أبد لاتحط في بالك أبرجع لك بعد ماانساك

.

ولا تحلم بعد يومٍ يجي لك شخص بااوصافي

.

أبيك تروح مع من هو عطيته حبّك وخلاّك

.

وانا خلني مع خلـّي نعيش فجوّنا الصّافي

شقاويّه رومانسيه

صدفتك مرّه فْدربي واخذتي عـقلي وقلبي

.

وصارت لي معك قصّه شقاويه رومانسـيه

.

قربت يمّك وْجيتك وبدّ النّاس خصّـيتك

.

وخذتك من طرف ايـدك وكلّمتـك بعـفويه

.

سألتك قصدي اتعرّف ولا ني قادر اتصرّف

.

سألتك من هـل البـاحه وقلتي لي حساويه

.

غلاي ومن غلا روحي شفاي وبلسم جروحي

.

وسلوة قلبي المغـرم مرادي يالشـقرديه

.

صرختي صرخه من جدّك وقلتي يابدوي حدّك

.

وش اللي انت تبي منّي وش اللي عاجبك فيه

.

وقلت ياحلـو هــدّي علامـك صايرٍ ضـدي

.

وتوّك ماخذه قـلبـي اثاريكِ مزاجيـه

.

علامـك ياهـوى بالي عليك القلب ميّالي

.

أعبّر لك عن احساسي ماهي باحلام ورديه

.

يابنت الناس وش فيكِ عسى الله بس يهديـكِ

.

أنا من جد أتكلّم ومغرم ميّه بالميـّه

.

أحبك كان تبغـيها ولاهي بكلمه تمويهه

.

أحبك حب من قلبي ولا غـيرك ابد ليّه

.

زعلتي وقلتي ياابن آدم تراجع لااجمع العالم

.

ومنك ياخذون حقي أنا ماني هواويه

.

انا ماني اللي في بالك ولا لي برقم جوالك

.

ثقيلة عقل موزونه واعرف الصّح والسيّه

.

عجبتيني عجبتيني عجبتي قلبي وعيني

.

رزينه والأدب عالي وزينٍ ماوجد زيّه

.

وانا هذا اللي عاجبني وليكي صار يجذبني

.

لوانك في الخلا الخالي بطولاتط شجاعيه

في دفتر ايامي

في دفتر ايّامي

.

كتبتك فارس احلامي

.

كتبتك حب بليا حدود

.

رسمتك حلم بآلامي

.

خذيتك نور في عيني

.

وصرتاللي وسط قلبي

.

هذاك اللي معذّبني

.

أحسّك جرحي الدّاني

.

حبيبي ليه ماترحم

.

وانا اللي حيل حبيتك

.

وعطيتك حبي السّامي

.

حبيبي ان كان و قصدك

.

تعذّبني بكثر صدّك

.

عليك الله تروح بعيد

.

في بعدك تحلا ايّامي

مملكتنا

مملكتنا مملكة أمن وأمان

.

مملكتنا مملكة حب وسلام

.

مملكتنا فخرنا دار البيان

.

بالشريعه حكمنا وحدّ الحسام

.

أسس الوحده بها رجل الزمان

.

ابو تركي وقادها الى الأمام

.

قادها للعز من عقب الهوان

.

والحروب اللي بها والإنتقام

.

وحّد صفوف القبايل كل مكان

.

في الجزيره كلها وعم النظام

.

خلا الصحراء بها شبه الجنان

.

في تحضّر في تطوّر كل عام

.

والسعودي مايظام ولا يهان

.

كل فردٍ ماخذ حقوقه تمام

.

مملكتنا مملكة سلم وأمان

.

عزّها الله حامي البيت الحرام

منك السموحه

منك السموحه ياغلا واعذريني

.

بالأمس انا أخطيت واليوم ندمان

.

غصبٍ علي اخطيت ماهو بديني

.

ماني ملك معصوم يابنت إنسان

.

تكفين لا تكفين لا تهجريني

.

كل يوم حالي بعد صدّك بنقصان

.

تدرين احبك منزلك وسط عيني

.

وفي القلب لك يابنت الاجواد أوطان

.

اسألك انا بالله لاتذبحيني

.

روفي بحال اللي يحبك من ازمان

.

وان كان ودّك ياحياتي تبيني

.

أقول آسف انا آسف وغلطان

.

بس المهم يانور قلبي تجيني

.

وصلك يريّحني وانا بين الاحزان

أكذب على نفسي

أكذب على نفسي الى قلت مابيك

.

واخادع الواقع الى قلت بنساك

.

وشلون ماحبك وانا ميّتٍ فيك

.

واموت واحيا كل ماحل طرياك

.

ياغايتي وراحتي بين اياديك

.

بالحيل احبك حب أعمى وأهواك

.

ياعمري الباقي وانا كلي افديك

.

أيضاًحياتي كلها اليوم تفداك

.

وان كان غرّك غيري الله يهنيك

.

والله يعوّض قلبي اللي تمنّاك

.

هذا ولا ني ياهوى البال ناسيك

.

بااصبر على فرقاك الى حدّ ماالقاك

مرتاح هذي صراحه

مـرتاح هذي صــراحــه

.......... مرتـــاح ماقـد شكيت

الحب ويّــــــاك راحــــه

.......... ياعـــــزّ منهـم فديت

ياوجه زايد سـمــــاحـه

.......... ماظـنّ مـثــلـك رأيـت

الليـــل انت وصـبــاحـه

.......... عــنك أبـد ماسـلـيـت

أكثر في قلبي جـــراحـه

.......... راضـــي أنا ماجـنيت

محــــال لا واسـتـبــاحه

.......... أنساك لا مـــــانويت

أيضاً ولا ابـي استراحه

.......... عـذّب اكـثـر لو بغيت

في الحب تجيد السباحه

.......... انت الغـــلا ماحـيـيت

مرتــاح انا ذي صراحه

.......... حــبٍ بـلـيـّــــاك ميت

مثل الورد

مثل الورد في حبك

.

اموت من العطش واذبل

.

الى من غبت عن عيني

.

عليك الله وامان الله

.

مابيك تصد أو ترحل

.

دخيلك لاتخليني

.

تعال اسكن وسط قلبي

.

انا فقربك ترى مامل

.

وجودك يمّي يحييني

.

أبي لااشتقت انا لشوفك

.

بلاش اني اروح اسأل

.

أحسّك في شراييني

.

أنا مالي غنا عنّك

.

ولا لي غيرك احدٍ خلّ

.

تموت فبعدك سنيني

.

أبيك تظل هنا جالس

.

وكل ليله عليا يطل

.

هلالك مايجافيني

.

عشانك غاليٍ بالحيل

.

انا والله مااتمهزل

.

ترى فيني اللي كافيني

.

أبي قربك فقط لاغير

.

حبيبي قل لي وش هو الحل

.

عطيتك كل عناويني

.

اذا موافق تعال اليوم

.

انا ناطرك بس تقبل

.

واحط ايديك في يديني

.

واعيش العمر في أفراح

.

يامن أفراحي بك تكمل

.

ياأغلى كل محبيني

.

واذا ماانته مصدقني

.

بقول لك كلمه ياعمري ؟

.

وامانه بس لا تزعل

.

أحبك .. وانت مشقيني

ماازعل عليك

.

ان كان جرح القلب يشفي غليلك

.

إجرح وعذّب واكثرالحزن فيني

.

مادام جرحي من همومك يشيلك

.

خذ راحتك سوّ ماتبي اليوم فيني

.

ماازعل عليك ولا أدوّر بديلك

.

تبقى الحبيب ومنزلك وسط عيني

.

لااشتقت انا لك في عيوني أجيلك

.

ولا نمت اشوفك حلم دايم يجيني

.

الا الهجر يانور عيني دخيلك

.

مابي تموت بطول هجرك سنيني

.

خل الوصل أرجوك لجلي دليلك

.

يحلا بوصلك كل حلوٍ وشيني

.

ياصاحبي في الحب كمّل جميلك

.

خلّك معي تبيني او ماتبيني

يالطيفه

هذه القصيده كتبتها لبنتي . لطيفه .

وأرجو أن تنال قصيدتي على رضاكم ولكم تحياتي وتقديري .

يالطيفه يابعد حيي وميتي

.
ياضياء عيني ويَا الصّدر الحنون

.
انتي انتي مثل ماكنتي بقيتي
.

حب غالي وكل غالي عنك دون
.

والله انّك ويّا روحي استويتي
.

واقسم بالله والعباد يشهدون
.

مانسيتك حتى لو انتي نسيتي
.

الا حبّك كل شي عندي يهون
.

والله اني لجل عينك ماحييتي
.

لااسعدك من كل شكل وكل لون
.

لاتقولي انسى حبك لابطيتي
.

كيف انسى حب نازل في العيون

لاتقسم بحبي

كاذبة أنتي ..

.

تحدثينني وكأنني فارسك الوحيد ..

.

أخذتيني بيدي بقوة أنثوية , رسمتي خلالها طريقة قتلي بيدي .

.

كاذبة أنتي ..

.

عندما تتوسلين إلي , عندما تتساقط دموع عينيك .

.

كاذبة أنتي

.

عندما تقومين بدور شهرزاد , الحبيبة المثالية .

.

كاذبة أنتي

.

ولن تتغيري , سوف تبقين أنتي أنتي كما كنتي

.

كاذبة أنتي

.

ان كنت ناوي عني تبعد وبتـــروح

.

ابعد ترى قلبي تعوّد على الـجــــرح

.

مع السلامه روح ياصاحــبي روح

.

لاتقسم بحــبــي وتجـمـع وتطــــرح

.

قلبي تعوّد وامتلا منّك جــــــــــروح

.

ماعدت تحزن به ولا عدت تفــــرح

.

ان رحت عني انت ياصاح مسموح

.

وان جيت مالك داخل القلب مطــرح

.

هذاك انا اول ازعج الجــــار وانوح

.

ابكي عليك ودايــماً فيـــك أســـــرح

.

واليوم لك باب الهجر صار مفتـوح

.

لا تبرر الموقف ولا ابيك تـشــــرح

.

ماني بأول واحد يموت مذبــــــــوح

.

ولاني بآخر من فــــــؤاده تجـــــرّح

.

جرّب ورح عني ولا تقول بــاروح

.

وتعرف من هو فينا اللي على صـح

حكم القدر

ياقمـــر خــمــســـة عـشــر
.

ماشـفـت زولك لــي شـهــر

.
أطـعــنت قــلبي في الظهــر

.

واشـقـيت عـيـني بالسهـــر

.
يابو نهـــود مـركــــــــزات

.

ياحــلـو يـازيـن البــــــنات
.

يابو ثـمـانٍ صــافـيـــــــات

.

سبّتك روحــي في خـطــــر
.

يابو عـيــون مكحـــــــــله

.

وهــــاك الردوف معــــزّله
.

حـطـّـمـت قلبي بالـــــــوله

.

يابو خـــــــدودٍ كالــزّهــــر
.

واتعبت روحي في هــــواك

.

ورميت بي وسط الهـــــلاك

.
شبعدك عني شاللي جــــاك

.

يـومـك تـطـــــوّل بالـهـجـر

.
تدري غــــلاك بْــلا حـــدود

.

وانت الـــذي بــدّ الوجــــود

.
مسكــنـك قـلبـي ياعـنـــــود

.

والنـــــاس تعــلــم بالخــبـر
.

يانور عـينـي والـفـــــــــؤاد

.

عـقـبـك حـيــــاتي في سواد

.
ليــه الـتـغــــــــلي بالبــعـاد

.

ذبحــت خــــلـّـك بـالـقـهـــر

.
تـعـال واطـلـب مـاتــــــــبي

.

يــاغـــايــتـي يـــامـطـلـبـي

.
لاتـــروح عـني وتـــذهــبي

.

املا عــيــــوني بالـنـــظـــر
.

تعال واخــــذ اللي تـشــــــا

.

مادام حـبــــك بي نـشـــــــا
.

وسـيّـر عـلي عـقـب العـشا

.

والصبــح من عـقـب الفجر

.
إرحـم فـؤادي اللي حــــــوا

.

غـــلاك وسـطه وانــكـــــوا
.

وارفـــق عليه مْن الهـــــوا

.

انـــا تــــرى مـثـلك بـشــــر
.

خلك حـليـــم ٍ وْعــطـــــوف

.

وانظر لحالي وانت تشـوف

.
لاتعـتـذر لي بالـظـــــــروف

.

تعــــال مــره في الشـهـــــر

.
قـبــــل العـمـــر لايـنـفــــني

.

أبـيـك مـــره تــــــــــزورني
.

وان كان قــلـبـــك عـــافـني

.

هــذا تـــرى حـكــم القـــــدر

اسستغفرالله العظيم

استغفـر الله العـظـيـــم ... من كل ذنبٍ عظـيـــم

.

ياربي اغفر ذنـــوبـــي ... أهــدني للمسـتـقـيــم

.

اجعلني لاامرك مطيـــع ... يامعتــلي ياسـمـيــع

.

اصلحـــني نوّر دروبـي ... يامنجّني من الجحيم

.

ياســـــــامـعٍ يـامجـيـب ... يابــــــــاريٍ يارقيب

.

إستـر عليه عْـيــــوبــي ... ياهـــاديٍ ياحلـيــــم

.

ياباسط الـــــــرزق يالله ... يامجيب للي دعـــاه

.

اجعل لي من ديني ثوبي ... واجعل فؤادي سليم

.

استـغــفــر الله العظــيــم ... من كل ذنبٍ عظيــم

.

لك يـــــــاإلاهي أتـــوبـي ... ياالدايم انت الرحيم

كانك تبين الصدق

كانك تبين الصدق يابنت مابيــك

.

حبــــــك نسيته مالك ايـة مكانه

.

دوري على غير يحبــك ويغليــك

.

مات الفؤادي اللي معه لك ميانه

.

هذاك الاول يوم انـــا ميّتٍ فيــــك

.

يومي أسيرك منك أرضى الإهانه

.

اليوم لا يابنت انـــا تبت مابيــــك

.

مالك نصيبٍ بي وهــــــذي أمانه

.

لاتحسبين الحب لعبه بـ ايــــاديـك

.

ماني بمن يقبــــــل بحب الخيانه

.

ولا تحسبي لو رحتي عني بناديك

.

غلطانه انتي ماني قايل فــــــلانه

.

عندي بدالك في الحـــلا من يعدّيك

.

خـــدٍ وقــــد وملــح وزين ورزانه

.

قلبه كبير وبالمحبه يبــــــــــاريك

.

والا انتي عنـــدي مالك ايّة مكانه

اختصري الدرب الطويل

احترت انا وشلون اصدق كلامـــك ......

.

وانتي ذبحتي القلب يابنت تجريــح

.

كنت احسب انك صادقه في غرامك ......

.

أثر المحبه معك راحت مع الريـــح

.

احترت اصدق فيـك حتى خصامـك ......

.

واحترت اصدق منك دمع التماسيح

.

أبي الحقيقه عنـــدي وش هو مرامك ......

.

قولي كـذا لا لا تقـــوليــن تـلـمـيــــح

.

اختصري الدرب الطويل شعـــلامك ......

.

لا لا تطــول السالـفه معــك ترجيـح

.

قولي احبـك جـــــاملـيـني فســــلامك ......

.

كلمة أحبــــك ماتـبـي أي توضـيــــح

.

أبــيـك دغـــري وضّحي لي كلامــك ......

.

ترى المحبه معك تحتــاج تصحــيـح

كنت انا وانتي

كنت انا وانتي .

.

كنا صغار

.

كنت انا وانتي

.

مانجتمع الا بالصدفة , في منزل جدتي في الطايف .

.

تحت اشعة الشمس البارده

.

فوق سطح الأرض الخضراء

.

كنت انا وانتي

.

نلعب , نمرح , نضحك , نبكي , نزعل .

.

ونرضى في نفس الوقت .!

.

كنت انا وانتي

.

توأمين نتشارك في قلب واحد .

.

كنت انا وانتي

.

ندوّن كل شي يحصل لنا وفي كل يوم .

.

واليوم ؟

.

كبرنا , وفرقتنا ظروفنا وابعدتنا ...

.

كنا سوى مانفترق لو دقيقه ......

.

كنا سوى نضحك ونلعب ونمرح

.

واليوم كلٍ سالكٍ في طريـقه ......

.

شوف حبنا شكان وشلون أصبح

المعاني الساميه

حبيبتي , كل الجروح اللي في قلــبي دامــيــة ....
.
لاتجرحيني , ارحميني ماأبي جرحٍ جـــديـــــد
.
خلي المحبه في فـــــــؤادي يالحبيبه بــاقــيــه ....
.
لاتذبحيها واجعليها في وسط قــلبــي تـــزيــــد
.
لاتتركيني وانتــي فـيـني , يالحبـيـبه داريــــه ....
.
ماتحمّل لو دقـــايـــــق تبعـــــــدي عـني بعـيــد

.

يالحـبـيـبـه يالبعــيـــــده يالقــريـبـه الوافـيـــه ....
.
ياحيـــــاتي ياغـنــاتي ياهــوى قــلبي الأكـيـــد
.
ودي اسأل ليه صـــدك ؟ ليه دايم قـــــــاسـيــه ؟....
.
ودي اسأل شاللي قلبك من عـــذابي مسـتـفـيـــد
.
صدقيني ان حيــاتي بلا وجـــــــودك خــــاليـــه ....
.
صدقـيـني في وجـــودك ,عايـشٍ عمـري سعـيـد
.
انتي حـبـي وانـتـي طـــبـي والـمـعـاني الساميه ....
.
وانتي كلّي والسـعـــاده والـفـرح دونــــك فـقـيد

.
وانتي ذوقـي وانـتي شوقي وانتي روحي الغاليه ...
.
وانتي عمري وانتي حزني والشقا وهمّي الوحيد
.
لا تروحــي لا تـصـحي هــمـومي اللي غــافــيـه....
.
لاتتركيني ارحميني ماأبــي جـــرحٍ جــديــــــــــد

تختلف عنهم كثير

كنت أراها كالملاك .
.
كنت أعشقها بلا حدود
.
كنت ولا زلت أحبها . بعمق وصدق .
.
أكثر من أي شئ في حياتي .
.
كنت عندما رأيتها أول مرة في حياتي ,
.
أحلم بقربها , بكلمة من شفاهها .
.
ودتئماً ماأنتظرها على ذلك الرصيف .
.
لم أمهل نفسي بعض من الوقت للتفكير في أن تكون الحبيبة المختارة .
.
ولم أتردد , بل بكل فخر.
.
أهديتها قلبي الذي يكن لها حباً لم ولن تجده عند بشر .
.
وهاأنا لازلت أتغنى بها حتى آخر لحظة من عمري لذا أقول لها .



بعيني تصوّرتك مثل باقي النّـاس ...............
.
واثرك جميلٍ . تختــلف عنهم غيـر
.
أثرك جميلٍ يختلف فيك الاحساس ...............
.
وحتى المشاعر .تختلف عنهم غير
.
أثرك قمـــرهم كلهـم وانت نبراس ...............
.
وردٍ طبيعي . تختـــلف عنهم غيـر
.
أثرك فـريــدٍ بالحــلا ياحجر مـاس ..............
.
مالك شبيهٍ . تختـلف عـنـهم غـيـر
.
ماكنت متصوّر من الرّاس للسّاس ..............
.
كاسيك ربي . تختــــلف عنهم غيـر

الله على كل المواجع يعيني

مَن لي .. يخبرها بأن الصبح لم يعد فاتحاً شرفته لي .

من لي.. والحب عاقداً حاجبيه .

من لي ..وأنفاسي كلها تخرج بثقل .

من لي .. والوطن الكبير بدأ يضيق علي وكأنني أراه كثقب إبرة .

من لي.. بأن يخبرها بأنني تائه في طرقات الحب

أبحث عنها أين أجدها

بين أوراق شعري المبعثرة

أم بين ألمي أم بين همّي الذي أصبح شريك

حياتي يقاسمني الفرح . يدعمني باليأس .

من يخبرني . كيف ألجم ألم الغياب .

من لي ..بأن يخبر حبيبتي بقصيدتي التي صرخت بقوة قائلة ..{

الله عـلى كل المـواجـع يعـينـي ...............

.
جـار الزمان وزاد همّي وآهاتي

.
على وليـفٍ قــاطــعٍ مايجـينـي ...............

.
خلا حياتي عقب صدّه شـــتاتي

.
ولفٍ هـويته مالحـبـه وزيـنـي ...............

.
حبه كبير ولـه مقـرٍ بــــــذاتـي

.
ولفٍ وخذ قلبي وعقلبي وعيني ..............

.
ماشفت مثله في جميع البناتي

.
يسحر بخـد وقـد وملـحٍ وزيني ...............

.
متفـرّد بزينه وحـلوا الصفاتـي

.
تكفون يااهل الحب ياسامعيني ...............

.
من يرحم المغرم ذبحني سكاتي

.
قولوا لخلي قـبـل موتي يحيني ...............

.
يرفق بحالي قبـل ياتـي مماتـي

.
يحس فـيني مـرةٍ لـي يجــينـي ...............

.
ودي انا أرتاح باقـي حـــيـاتـي

سافرت معشوقتي ...
.
أطرحها بين أيديكم متمنياً أن تحوز على رضاكم .

.
سافرت معشوقتي ..
.
سافرت معشوقتي بين سطور أوراقي .

.

وعانقـت شواطئ حبري المجنون .
.
سافرت معشوقتي ..

.

سافرت معشوقتي وتركت أحزانها ذكرياتي بِصَمات .

.

على جبين الوَرَق .
.
لتظل أحزاناً مشردةً . بين متاهات الحبر والوَرَق .!

.
سافرت معشوقتي .

.

سافرت معشوقتي وظل الدمع يجري ويجري
.
كالأنهار , والحبر يعزف . ويعزف كالأوتار .

.
سافرت معشوقتي .

.

سافرت معشوقتي وتركت أوراق شعري مبعثرةً فوق

.

طاولة مكتبي لتصبح عنوان عاشقٍ مهجور

.
هل . ياترى ستعود ؟

.
هل . ياترى سنلتقي ؟.
.
متى ؟ ... يوم الأحد ؟
.
أم إنها سافرت إلى وطنٍ ليس له وجود ؟
.
إلى الأبــــد .

.